حرب أكتوبر بنظرة ادارية للشركات

ازاي تحقق نصر أكتوبر في شركتك ؟

حرب أكتوبر يوم النصر العظيم يوم هيفضل معلم في الذاكرة سنين وقرون قدام و أي مصري بيعتز بية

بس تفتكر أنت كصاحب شركة أو مدير ممكن تستفيد من الحرب إزاي ؟

 بعيداً عن الكلام في الحرب وتفاصيلها المقال ده هيكون تصور لإدارات الشركة على أنها عناصر موجودة في حرب أكتوبر العناصر دي ساعدت في نجاح الحرب و أننا نشوف النصر العظيم دا ونفس العناصر دي لو بتأدي دورها بشكل سليم في الشركة هتحقق نصر أكتوبر.

طب تفتكر ايه اهمية الادارة في أي شركة ؟

  نجاح واستمرارية أي شركة في المقام الأول يعتمد على المهارات الإدارية والتنظيمية للمدير و فريق العمل, والهدف عند أي شركة ناجحة هو التخطيط الاستراتيجي السليم واتخاذ القرارات الصحيحة في الوقت المناسب والتأكد من أن الفريق جاهز و مستعد للعمل.

طب ايه العناصر الموجودة في حرب أكتوبر وساعدت في النجاح ؟

  • المدير أوالقائد :

زي  محمد أنور السادات كان عنده خطة وهدف قدر يحرك جميع العناصر لتحقيقة ودي مواصفات أي مدير ناجح سواء مدير الشركة أو مدير كل إدارة.

  • سلاح الطيران :حرب اكتوبر

ممكن نتخيل أن سلاح الطيران في أي أدارة هو قسم التسويق اللي بيمهد الطريق وبيشوف احتياجات السوق والعميل بناءاًعليه بيعمل استراتيجية وخطة واضحة لتسهيل الوصول للهدف (العميل) وتسهيل عملية البيع على ادارة المبيعات, زي سلاح الطيران هو صاحب الضربة الأولى فى الحرب. 

  • المشاة :

سلاح المشاه بيمثل قسم المبيعات لانه بيخلص المهمة بعد تمهيد الطريق من خلال قسم التسويق وهو المحرك الرئيسي للإيرادات.

عامل الوقت والجودة مهم بالنسبة لرجل المبيعات لانه لو أتاخر في الرد والمتابعة مع العميل ممكن يروح لمنافس تاني, زي الحرب لو سلاح الطيران مهد الطريق للمشاة والمشاة اتاخرت ممكن العدو يجهز تحصيناته تاني.

نفس الفكره عند رجل المبيعات لو اتأخر في دوره بعد قسم التسويق العميل هيدور علي منافس تاني بيقدم نفس الخدمة.

  • المدفعية :حرب اكتوبر 73

دور الإدارة مخلصش لسه دور المدفعية  أو إدارة خدمة العملاء ممكن توقع الشركة أو تكون نقطة قوة فيها لانك لو مهتمتش بالعميل بعد عملية البيع ممكن تخسره وكمان تخسر قاعدة عملاء محتملين و هيكلفك ضعف تكلفة العميل الجديد, زي الحرب لو المدفعية مهتمتش بالمشاة وغطت عليها ممكن تضيع مجهود باقي الإدارات لأن الحفاظ على النجاح أصعب من النجاح نفسه.

وكان في عناصر تانية ساهمت في النجاح زي الدول العربية وأقرب تشبيه ليها إدارة المالية لأن مهمتها تنظيم المعاملات المالية ومن أهم أدوارها تحقيق أهداف الشركة بأقل تكلفة ممكنة وطبعا مننساش اخر يوم في الشهر بنستنا المحاسب علي باب الشركة.

ومننساش المستشفيات كان لها دور عظيم في الحرب وأقرب تشبيه ليها إدارة الجودة ومن مسؤوليتها حماية الأفراد العاملين من أي مخاطر في العمل.

 والشعب المصري العظيم أقرب تشبيه ليه إدارة الموارد البشرية ومسؤوليتها تهيئة الجو المناسب للعاملين وفي الحرب الشعب كان بيساند الجيش بالإمكانيات المتاحة من مواد غذائية و دعم نفسي ومعنوي.

ومننساش طبعا أن كل الادارات كان بينهم ترابط وهدف محدد من البداية والأهم من كل ده هو الروح الموجودة بين الإدارات اللي خلتنا نشوف نصر أكتوبر بعد ما كان حلم عند كل مصري و رحم اللة شهداء الوطن المصري جميعاً وشكرا لكل حد ساهم في حرب أكتوبر الي هتفضل علامة في تاريخ كل مصري يفتخر ويعتز بها. 

بعد المقال ده تفتكر شركتك ناقصها ايه من العناصر دي عشان تكون شركة ناجحة وكمان في أسئلة لازم تسألها لنفسك كل فترة زي :

  • – ايه وضع شركتك الحالي وعايز توصل لفين؟

  •  فكرت تعمل تحليل لإدارات الشركة علشان تعرف ايه الإدارة الموجودة في شركتك محتاجة تطوير؟

دا تقييم هيساعدك تجاوب على الاسئلة دى و تعرف تقييم شركتك صح و تعرف محتاج تطور اى فيهاBusiness Assessment

خدمات الاستشارات و التدريب المقدمة من hpa

خدمات قطاع الأستشارات     |     خدمات قطاع التدريب