تسويق ببلاش

التسويق في اشكال كتير, و منها اللي تكلفته عاليه جدا و منها اللي تكلفته اقل شوية, لكن انهاردة احنا هنتكلم عن شكل من اشكال التسويق اللي تكلفته “ولا حاجه” اسلوب تسويق ببلاش, بس متفرحش اوي كده .. لأن مش سهل تعمله.

خليني الاول اشرحلك ببساط ايه هو التسويق اللي ببلاش ده, الـWOM – Word of mouth او بمعنى اخر هو التسويق الشفهي.

يعني ايه تسويق شفهي ؟

التسويق الشفهي WOM هو لما اهتمامات المستهلك بالمنتج او الخدمة اللي انت بتقدمه ينعكس على حياته اليومية, فيبدأ في حواراته مع الاشخاص اللي حواليه يتكلم عن علامتك التجارية, فمنغير ما يحس يبقى العميل هو سفير علامتك التجارية و ماشي بيسوقلك ببلاش, و مش بس كده ده كمان الاسلوب ده هو اكثر اساليب التسويق مصداقية و ثقة على الاطلاق, لأن لما واحد صاحبك يجي يكلمك عن منتج استخدمه و عجبه هو مش مستفيد اي حاجه بالتالي انت هتصدقه لأنك بتثق فيه بشكل شخصي و هتجرب المنتج اللي هو رشحهولك.

ABC

الموضوع يبان سهل لكنه للأسف مش كده, لأن الـ WOM زي ما سهل يجيبلك عدد كبير من العملاء و يبقى زي الاعلان المجاني اللي شغال باستمرار عن علامتك التجارية, هو بردو سهل يوقع مبيعاتك بالكامل و يكره العملاء فيك و العميل اللي كان بيسوقلك يبقى هو نفسه العميل اللي بينصح الناس تبعد عن منتجاتك.

الموضوع كله معتمد على تجربة العميل الكامله و اهتمامك بيه, لو بتقدم منتج كويس بجودة كويسة و عندك خدمة عملاء بمستوى احترافي سهل جداً تعتمد على التسويق الشفهي.

و لأنك كـ Marketer من ضمن شغلك هو معرفة اراء العملاء, و ايه اللي تقدر تطورة في منتجك و ازاي تواكب السوق و تدرس المنافسين و غيرة من المهام المطلوبة من ادارة التسويق, كل ده هيسهل عليك كتير جدا انك تقدم للعميل بتاعك تجربة متكاملة ناجحة و مرضية بالنسبالة تخلية يسوقلك بنفسة, و ينصح كل دائرة معارفة بتجربة منتجاتك لأنك ببساطة بتقدم اللي هو محتاجة.